«Манчестер Юнайтедтің» бұрынғы бас бапкері Эрик тен Хаг Криштиану Роналду туралы пікір білдіріп, португалиялық шабуылшының соңғы жылдардағы ойын деңгейіне қатысты ойын айтты, деп хабарлайды Ozgeris.info
Нидерландиялық маманның сөзінше, Роналду – футбол тарихындағы ең ұлы ойыншылардың бірі. Дегенмен оның пікірінше, португалиялық жұлдыз соңғы жеті-сегіз жылда бұрынғыдай деңгейде өнер көрсете алмаған.
«Менің ойымша, Криштиану – сөзсіз керемет футболшы әрі барлық уақыттағы ең үздік ойыншылардың бірі. Бірақ соңғы жеті-сегіз жылда ол бұрынғы деңгейінде ойнай алмады», – деді тен Хаг.
Сондай-ақ бапкер Роналдудың «Реал Мадридтен» кеткен кезеңіне тоқталды.
«Ол «Ювентуске» ауысқан сәттен бастап, іс жүзінде бір дәуір аяқталды. «Реал Мадридтің» басты артықшылықтарының бірі – клуб аңыз ойыншылармен қоштасатын уақытты әрдайым дәл таңдай біледі», – деп атап өтті маман.
Тен Хаг «Манчестер Юнайтедте» Роналдумен бірге жұмыс істеген кезеңін де еске алды. Оның айтуынша, футболшыға команданың ойын стилі, алаңдағы міндеттері және бапкердің одан күтетіні алдын ала түсіндірілген.
Алайда жоғары деңгейдегі футболда тек есім мен бұрынғы жетістіктер жеткіліксіз. Тен Хагтың пікірінше, ойыншы күн сайын өзін барынша шыңдап, жоғары қарқынды жаттығуларға төтеп беріп, мінсіз физикалық бабын сақтауы керек.
«Соңында сен командаға нақты пайда әкелуің қажет. Криштиану енді бұрынғыдай ауыр жұмысқа төтеп бере алмады. Премьер-лигада табысқа жету үшін күн сайын шегіңе дейін жұмыс істеп, барынша жоғары қарқынмен жаттығу және физикалық бабында болу аса маңызды», – деді ол.
Бапкердің сөзінше, физикалық дайындықтың маңызы тек Англия чемпионатында ғана емес, Чемпиондар лигасы мен Португалия құрамасында да айрықша.
Тен Хагтың бұл пікірі Роналдудың футболдағы орнына қатысты тағы бір пікірталасқа түрткі болуы мүмкін. Десе де португалиялық жұлдыздың мансап жолы, рекордтары мен жетістіктері оның футбол тарихындағы айрықша орнын әлдеқашан айқындап қойған.
