Астанада Конституциялық референдум қорытындыларына арналған форум өтті. Іс-шараға қоғамдық ұйым өкілдері, саяси партия мүшелері және «Жаңа адамдар» жастар қозғалысының белсенділері қатысты деп хабарлайды ozgeris.info сайты.
15 наурызда өткен референдумда қазақстандықтар Конституцияның жаңа жобасын қолдап, ел дамуының жаңа кезеңіне жол ашты. Бұл үдерісте жастардың белсенділігі ерекше байқалды.
Форум барысында қозғалыс белсенділері арнайы перформанс ұйымдастырып, қоғамдағы өзгерістер азаматтардың қатысуымен жүзеге асатынын көрсетті.
Жиында «Жаңа адамдар» қозғалысының көшбасшысы Асель Баденова сөз сөйлеп, Конституция жобасының халықтық талқылаудан өткенін атап өтті. Оның айтуынша, құжатта қоғам ұсынған негізгі құндылықтар көрініс тапқан.
«Қоғам айтқан қағидалар бүгінде Конституция деңгейінде бекітілуде. Ел дамуының негізі ретінде патриотизм, еңбек, білім және отбасы құндылықтары айқындалды», – деді Асель Баденова.
Мемлекет басшысы Қасым-Жомарт Тоқаев та жаңа Конституция адам капиталын дамытуға, білім мен ғылымға басымдық беретін стратегиялық құжат екенін атап өткен.
