Қазақстанда алдағы жаз және күз айларында тұрғын үй бағасының күрт қымбаттауына негіз жоқ. Мұндай пікірді Рустам Карагойшин — Бәйтерек холдингінің басқарма төрағасы білдірді деп жазды ozgeris.info сайты.
Оның айтуынша, қазіргі нарықтағы жағдайға теңгенің нығаюы мен инфляция деңгейінің динамикасы әсер етуде. Карагойшин инфляция көрсеткіштері күткеннен де жақсы қарқынмен қалыптасып жатқанын атап өтті.
«Қазір тұрғын үй бағасының күрт өсетініне нақты алғышарт көріп тұрған жоқпын. Бірақ бұл мәселе бойынша ресми мәлімдемені мемлекеттік органдар жариялауы тиіс», — деді ол Қазақстан машина жасаушылар форумының кулуарында.
Сонымен қатар холдинг тек бастапқы тұрғын үй нарығымен жұмыс істейтінін атап өтті. Сондықтан қайталама (екінші нарықтағы) пәтер бағасына қатысты нақты баға беру қиын екенін жеткізді.
Ал Қазақстан қаржыгерлер қауымдастығының пікірінше, халықтың төлем қабілеті төмендеген жағдайда ипотекалық нарықта баяулау байқалуы мүмкін. Себебі соңғы уақытта тұрғын үй бағасы өсіп жатқанымен, халық табысы сәйкес деңгейде артпай отыр.
Сарапшылар мұндай жағдайда нарықта сұраныстың төмендеуі ықтимал екенін және бұл жалпы динамикаға әсер етуі мүмкін екенін айтады.
