Қазақстан азаматы Дамилә Тасмағамбетова "Украина жаулары" тізіміне енгізілді

Киевтің "қара тізіміне" кірген Дамилә Тасмағамбетова туралы не белгілі? Әшкере телеграм арнасы бұған дейін бірқатар украиналық Telegram арналар Тасмағамбетоваға қатысты даулы ақпарат жариялағанын мәлімдеді. Ондағы дерекке сүйенсек, Тасмағамбетова қазіргі уақытта Мәскеуде тұрып, пропаганда жұмыстарымен белсенді айналысады. Ол «Томирис» продюсерлік орталығы мен «Караван Инфо» атты ақпарат агенттігін басқаратын көрінеді. Украиналық тарап Тасмағамбетованың белсенділігін Ресейдің арнайы қызметімен (ФСБ және ГРУ) байланыстырып отыр. Олардың айтуынша, Тасмағамбетова Украина мен Орта Азиядағы тұрақтылықты шайқалтуға бағытталған тапсырмаларды орындайды. Бұған қоса, Қазақстанға жиі келіп, Алматыда «Караван Инфоның» филиалын ашқаны да атап өтіледі, бұл әрекет кейбір сарапшылардың пайымдауынша, оның үгіт-насихат жұмыстарын кеңейтуге талпынғанын білдіреді. Бір мысал ретінде, ол жақында ресейлік мүддеге сай түсірілген «Буча: цена лжи» деректі фильмін көпшілікке таныстырған. Бұл фильм украиналық Буча қаласындағы қақтығыс оқиғаларын Ресейдің көзқарасымен көрсетуге тырысқан. Егер украиналық дереккөздердің сөзі шындыққа жанасса, онда Тасмағамбетованың Қазақстандағы ақпараттық алаңға кірігуі қарапайым медиа жобадан гөрі әлдеқайда терең мақсаттарды көздеуі ықтимал.