Бүгін FlyArystan-ның Түркістан-Астана рейсі 15 сағатқа кешігіп жатыр

29 шілдеде сағат 00:55-те ұшуы керек болған КC7362 Түркістан-Астана әуе рейсі 15 сағатқа кешіктірілді, деп хабарлады FlyArystan компаниясы ресми Telegram арнасында. «Рейс Түркістан қаласының жергілікті уақыты бойынша алдын ала 29.07.2023, сағат 16:30-да ұшуға жоспарланып отыр. Біз жолаушылардан түсіністікпен қарауды сұраймыз және ұшу қауіпсіздігі біздің басты приоритетіміз екенін еске саламыз», - делінген хабарламада. Әуе компаниясы рейс жолаушылары сусын, ыстық тамақпен қамтамасыз етілетінін атап өтті: 1. Екі сағаттан артық кешіктірілген кезде: жолаушылар алкогольсіз сусындар, сондай-ақ 5 минуттан аспайтын екі телефон қоңырауын немесе екі электрондық пошта хабарламасын сұрай алады; 2. Төрт сағаттан артық кешіктірілгенде, ыстық тамақ ұсынылады. Сусындар мен тағам мәселелері бойынша әуежайдағы FlyArystan өкілдеріне хабарласу қажет; 3. Бес сағаттан артық кешіктірілгенде, бір рет тегін әуебилеттің уақытын өзгерту мүмкіндігі ұсынылады; 4. Бес сағаттан артық кешіктірілгенде, егер қайта брондау мүмкін болмаса, жолаушылар толық билет қайтарымын іске асыра алады; 5. Күндізгі уақытта 8 сағаттан артық және түнде 6 сағаттан артық кідіріс болса, жолаушыларға қоныстануға, сондай-ақ қоныстану жеріне дейін және кері қарай трансфер қарастырылады.

Аталған мәселелер бойынша жолаушылардан FlyArystan өкілдеріне хабарласуларыңызды сұраймыз, барынша қолдау көрсетілетін болады, - деп мәлімдеді әуе компаниясы.