Ақмола облысында АН-2 ұшағы апатқа ұшырады, деп хабарлайды Ozgeris.Info тілшісі Төтенше жағдайлар министрлігінің баспасөз қызметіне сілтеп.
ТЖМ мәліметінше зардап шеккендер жоқ.
«Державинск қаласынан 10 шақырым жерде АН-2 ұшағы көтерілу кезінде өртенді», - делінген хабарламада.
Ұшқыш жанып жатқан ұшақтан өз бетінше эвакуацияланған. Қазір өрт сөндірілді.
Өрттің шығу себебі анықталып жатыр.
Мұндай апат АН-2 ұшағында жиі болады. Aviation Safety Network жобасының онлайн базасында ұшақ 618 рет әуе апатына ұшырап, салдарынан 776 адам қаза тапқан.
2021 жылдың 4 шілдесінде сағат 07.00-де Қызылорда қаласының Қарауылтөбе ауылынан 12 шақырым жерде күріш егістігін өңдеу кезінде АН-2 ұшағы құлады. Ол ұшып шыққаннан кейін бірнеше сағаттан соң техникалық ақау салдарынан қонуға мәжбүр болып, егіннің үстіне құлаған.
2022 жылдың 11 ақпанында АН-2 ұшағы Камчаткадағы Коряки ауылының маңында құлаған. Қаза тапқандар жоқ.
2024 жылдың 19 шілдесінде Ан-2 ұшағы Арменияның Котайк облысындағы Егвард қаласының маңында апатқа ұшырады, екі адам қаза тапты.
2024 жылы 3 мамырда Қазақстанның Қостанай облысында апатқа ұшыраса, 21 шілдеде АН-2 тағы да апатқа ұшырады.
