Таяу Шығыстағы әскери қақтығыс аясында әлемдік нарықта мұнай бағасы күрт өсіп, барреліне 100 доллардан асты. Бұл туралы ozgeris.info хабарлады.
Дүйсенбі күні таңертең Brent маркалы мұнай фьючерстері 18,35 долларға немесе 19,8%-ға қымбаттап, барреліне 111,04 доллар деңгейіне жетті. Сарапшылардың айтуынша, баға өсімі әлі де жалғасуы мүмкін.
Мұнай бағасының көтерілуі АҚШ пен Израильдің Иранға қарсы әскери әрекеттері және аймақтағы шиеленістің күшеюімен байланысты. Нарық қатысушылары қақтығыс Ормуз бұғазы арқылы мұнай жеткізіліміне қауіп төндіруі мүмкін деп алаңдауда.
Сонымен қатар Ирак пен Кувейт мұнай өндіру көлемін қысқарта бастағаны хабарланды. Сарапшылардың болжамынша, жақын арада БАӘ мен Сауд Арабиясы да өндірісті азайтуы мүмкін.
Reuters мәліметінше, қақтығыс жалғаса берсе, әлем бойынша жанармай бағасының қымбаттауы бірнеше апта немесе айға созылуы мүмкін.
Демалыс күндері АҚШ пен Израиль Иран аумағындағы бірқатар нысандарға, соның ішінде мұнай сақтау қоймаларына әуе соққыларын жасаған. Осыдан кейін Тегеранда өрттер мен жарылыстар тіркелгені хабарланды.
Ал АҚШ президенті Дональд Трамп Truth Social желісінде мұнай бағасының қымбаттауы уақытша құбылыс екенін айтып, ол Иранның ядролық қаупі жойылғаннан кейін төмендеуі мүмкін екенін мәлімдеді.
