Бұл туралы бала құқықтары жөніндегі уәкіл Динара Зәкиева мәлімдеді. Ол жұмыс тобымен бірге И. Нүсіпбаев атындағы мектеп-интернатындағы балалардың өмір сүру жағдайымен танысқан.
Нәтижсінде 6 жастан асқан 170 бала интернатта ауыр жағдайда өмір сүріп жатқаны белгілі болды. Үш жыл бұрын мекемеде күрделі жөндеу жұмыстары басталғанымен, мердігер оны аяқтамай, жосықсыз деп танылды.
Соның салдарынан балалар жартылай қираған ғимаратта тұруға мәжбүр, оқу корпусында түнеп, спортзалда тамақтанады, ал санитарлық-гигиеналық нормалар бұзылып отыр.
Бұл мәселе және облыстағы балалар қауіпсіздігіне қатысты тағы екі маңызды сұрақ Алматы облысының әкімі Марат Сұлтанғазиевпен кездесу барысында талқыланды.
Әкімдік жөндеу жұмыстарын аяқтау немесе жаңа интернат салу мәселесін қарастырған. Алайда балалардың қазіргі қиын жағдайында қалмауы үшін оларды жақында жөндеуден өткен және бос орындары бар басқа интернатқа көшіру туралы шешім қабылданды.
Сондай-ақ, кездесуде Психологиялық қолдау орталығының жұмысы мен қорғаншылық органдары қызметкерлерінің санын арттыру мәселесі көтерілді.
Қабылданған заңға сәйкес, 5000 балаға 1 қызметкерден келуі керек. Осылайша, облыста 109 қызметкер болуы тиіс, әр ауданда шамамен 10 маманнан. Бұл жүйенің тиімді жұмыс істеуі, балаларды қорғау және зорлық-зомбылықтың алдын алу шараларын сапалы жүргізу үшін өте маңызды, әсіресе өңірдегі зорлық-зомбылыққа қатысты күрделі жағдайды ескере отырып.
"Бұдан бөлек, өңірлік уәкіл Айгүл Есімбековамен және Психологиялық қолдау орталығының ұжымымен кездестім. Қазіргі таңда орталықтың кураторлары мектептерді аралап, суицидтің алдын алуға арналған бірыңғай бағдарлама енгізу бойынша жұмыс жүргізуде", - деді ол.
Айта кету керек, сәуір айына Алматы облысының аудандарында ОАМ Балалардың құқықтарын қорғау комитеті, Мәдениет, Денсаулық министрліктері және ІІМ әріптестерімен бірге 7-10 күндік жұмыс сапары жоспарланған.
