Танымал композитор, әнші, ҚР Мемлекеттік сыйлығының иегері, Қазақстанның халық әртісі Ескендір Хасанғалиев неге анасының тегін алған? Бұл сұраққа өнер иесінің ұлы Біржан Хасанғалиев Kaz.inform.kz порталына берген сұхбаттарында жауап берді, — деп хабарлайды Ozgeris.info тілшісі.
Оның айтуынша, Ескендір Хасанғалиев нағашыларының қолында өскен.
«Әкем нағашыларында тәрбиеленіп өскендіктен, сол кісілердің атымен тарихта қалды. Туған әкесі — Құбаш Ибрашев, анасы — Қанаш Өтегенқызы. Туған атам 1942 жылы 24 жасында ауырып қайтыс болады. Сөйтіп, нағашы атасы Өтеген Хасанғалиев пен Бақия әжесі оны қамқорлығына алады. Ескендір Хасанғалиев 1961 жылы ең алғашқы шыққан «Анаға сәлем» әнін туған шешесі Қанашқа емес, әжесі Бақияға арнаған. Нағашы атасы мен әжесін қатты жақсы көрген. Өкінішке қарай, Құбаш атамның аты ұмыт қалды. Әкем туған әкесі туралы кейін білген», — деді Біржан Хасанғалиев.
Ескендір Хасанғалиевтің ұлы бірнеше жыл бұрын тегін өзгерткісі келгенін, бірақ әкесі қарсы болғанын айтты.
«Жиырма жасымда фамилиямды, яғни тегімді Ибрашев деп өзгерткім келді. Бірақ әкем іштей оған қарсы болды. Мен соны сездім, көрдім. Содан кейін ойымнан бас тарттым. Хасанғалиев деген тег — бренд. Барша қазақ таниды. Осылайша, Хасанғалиев болып қалдым. Балаларым да Хасанғалиевтер», — деді ол.