Ғылым қызметкерлері күні қарсаңында «Қазақмыс» Тобында өнертапқыштық бастамаларды дамытуға бағытталған жаңа ауқымды жоба іске қосылады ozgeris.info сайты.
Жоба қызметкерлердің ұсыныстарын жинаумен ғана шектелмей, инновациялық қызметті жүйелі экожүйеге айналдыруды көздейді. Оның негізгі мақсаты – ғылыми ізденістер мен өндірістік тәжірибені біріктіре отырып, жұмыскерлердің зияткерлік әлеуетін дамыту.
Бастама дәстүрлі өнертапқыштық байқау форматынан шығып, қызметкерлердің практикалық тәжірибесін ғылыми тәсілдермен ұштастыратын жаңа өзара әрекеттесу моделін қалыптастыруға бағытталған.
Жобаның ғылыми бағыты ұсынылған идеяларды құрылымдап, оларды өндірістік деңгейге жеткізу кезеңдерін қамтиды. Атап айтқанда, терең ғылыми негіздеуді қажет ететін бастамалар іріктеледі, кейін ғылыми-техникалық кеңес аясында зерттеулер жүргізіліп, технологиялық шешімдер әзірленеді. Бұдан соң ұсыныстар өндірістік жағдайда сынақтан өткізіледі.
Сонымен қатар зияткерлік меншікті қорғауға ерекше назар аударылады. Компания инновацияларды стратегиялық инвестиция ретінде қарастырып, үздік идеяларды патенттеу мен авторлық құқық арқылы тіркеуді жоспарлап отыр. Бұл ғылыми зерттеулер мен әзірлемелер саласындағы құнды активтер қорын қалыптастыруға мүмкіндік береді.
Аталған тәсілдің тиімділігі бұған дейін «Қазақмыс Смэлтинг» бөлімшесінде дәлелденген. Соңғы бір жыл сегіз ай ішінде қызметкерлер 500-ге жуық идея ұсынып, олардың шамамен 12 пайызы өндірісте жүзеге асырылған. Нәтижесінде компанияға 3 миллиард теңгеге жуық экономикалық пайда түскен.
Жаңа жобаны іске қосу инновациялық қызметті Топ көлемінде жүйелеп, ғылым мен өндіріс арасындағы байланысты нығайтуға бағытталған. Бұл өз кезегінде қауіпсіздік пен тұрақты дамуды қамтамасыз ететін заманауи корпоративтік мәдениетті қалыптастыруға мүмкіндік береді.
