Ұлытау облысына қарасты Жәйрем кентінде қайғылы оқиға орын алды. 42 жастағы төрт баланың анасы бірге тұрған ер адамның қолынан қаза тапты деп хабарлайды ozgeris.info сайты.
Алдын ала мәліметтерге сәйкес, күдікті әйелге бірнеше рет пышақ жарақатын салған. Оқиға күндіз, марқұмның жұмыс орнында болған.
Жақындарының айтуынша, әйел еңбекқор, балаларын жалғыз өзі асырап отырған ана болған. Оның төрт баласы бар, олардың бірі – ерекше күтімді қажет етеді.
Белгілі болғандай, марқұм күдіктімен ресми некеде болмаған. Уақыт өте келе олардың арасында жанжалдар жиілеп, ер адам тарапынан агрессия мен зорлық-зомбылық әрекеттері байқалған. Әйел бұған дейін бірнеше рет құқық қорғау органдарына жүгінгені де айтылды.
Оқиға күні әйел қарым-қатынасты тоқтатуға шешім қабылдаған. Алайда бұл жағдай қайғылы оқиғаның алдын ала алмаған.
Күдікті шабуыл жасағаннан кейін өзіне де зақым келтіруге әрекет жасаған. Қазіргі уақытта ол медициналық мекемеде күзетпен жатыр.
Аталған факті бойынша «аса қатыгездікпен жасалған кісі өлтіру» бабы бойынша қылмыстық іс қозғалды. Тергеу амалдары жүргізілуде.
Қазір марқұмның балалары ауыр психологиялық жағдайда. Туыстары әділ тергеу жүргізіліп, балалардың тағдыры назардан тыс қалмауын сұрап отыр.
