"Жаңа адамдардың" музыкалық лейблі Özim қыздар тобы орындаған ÖZGERIS әніне түсірілген клипті ұсынды. Жоба адамның өз пікірін білдіру, саналы шешім қабылдау және жеке шекараларын қорғау құқығын көркем түрде жеткізеді. Музыка мен визуалдық образдар өзгерістер адамның үнсіздіктен бас тартып, өз ұстанымына сай әрекет еткен сәттен басталатынын көрсетеді, деп хабарлайды ozgeris.info.
Бейнебаян желісі ішкі таңдауға — «жоқ» деп айта алу, өзін қорғау және қысымға қарсы тұру тақырыбына құрылған. Негізгі идея — әр адамның еркіндігі мен қорқынышсыз шешім қабылдау құқығын көрсету. Сонымен қатар, некеге мәжбүрлеу және «алып қашу» мәселесі қозғалып, мұндай әрекеттер еріктілік пен өзара құрметке негізделген дәстүрлерге қарама-қарсы қойылады.
2024 жылы Қазақстанда некеге мәжбүрлеу үшін жауапкершілік енгізіліп (ҚР ҚК 125-бабы), тұрмыстық зорлық-зомбылық үшін жазаны күшейтетін қылмыстық және әкімшілік заңнамаға өзгерістер қабылданды, сондай-ақ ІІМ құрамында әйелдерді қорғауға бағытталған арнайы бөлімше құрылды. Бұл шаралар бейнебаянда көтерілген мәселелердің өзектілігін және адам құқықтарын құрметтеу мәдениетін қалыптастыру қажеттігін айқындайды.
ÖZGERIS клипі мәдениет пен құқық бұзушылықтың шекарасын айқындап, саналы таңдаудың маңызын көрсетеді. Жоба жеке жауапкершілік, еркіндік және адамның ішкі күші туралы ой қозғайды. Осы құндылықтар қоғамдағы өзгерістердің бастауына айналуы мүмкін.
