Алматыда жас келіншек үш баласының көз алдында асылып қалды

Алматыда жас келіншек үш баласының көзінше пәтерінде асылып қалды, деп хабарлайды «Өзгеріс» ақпараттық-сараптамалық порталы. «Мамыр» шағынауданында өзіне қол жұмсаған әйел туралы қоғам белсендісі Жібек Әменова әлеуметтік желіде хабарлады. Жазба авторының айтуынша, бұл жағдай жан-жақты тергелуі тиіс, өйткені жас әйелдің шарасыздықтан балаларын тастап, өмірін үзуіне қандай да бір себеп болуы керек. Көршілері марқұмның бірнеше рет тұрмыстық зорлық-зомбылыққа ұшырағанын жеткізген. Алматы полициясы бұл дерек ҚР Қылмыстық кодексінің 105-бабы «Өзiн-өзi өлтiруге дейiн жеткiзу» бойынша соталды тергеудің бірыңғай тізіліміне тіркелгенін мәлімдеді.

«Әуезов аудандық полиция басқармасына қарасты полиция бөлімінің қызметкерлері 1994 жылы туған Б-ның өлімінің себептері мен мән-жайын анықтауға бағытталған кешенді жедел-іздестіру шараларын жүргізіп жатыр. Қылмыстық іс бойынша ҚР ҚПК-нің 201-бабына сәйкес өзге ақпарат тергеу мүддесіне орай жарияланбайды», - деп хабарлады ведомстводан.