Павлодар қаласында ерекше бала тәрбиелеп отырған ана әлеуметтік желі арқылы көпшіліктен көмек сұрап, көршісінің жөнсіз әрекеттерінен әбден зәрезап болғанын жайып салды. Тұрғынның айтуынша, қатарлас пәтерде тұратын ер адам ұзақ уақыт бойы олардың мазасын алып, ақылға сыйымсыз қылықтар көрсетіп келген. Жас ана басынан өткен қиын жағдайды баяндай отырып, көршісінің тарапынан төнуі мүмкін қауіп-қатерден қатты сескенетінін жеткізді деп хабарлайды ozgeris.info сайты.
Бұл мәселеге тәртіп сақшылары дереу араласты. Белгілі болғандай, аталған азамат бұған дейін де тыныштықты бұзғаны үшін екі мәрте әкімшілік жауапкершілікке тартылған екен. 14 сәуір күні полиция қызметкерлері пәтер иесімен арнайы сөйлескеннен кейін, жанжал шығарған ер адам тұрып жатқан үйінен біржола шығарылды.
Тәртіп бұзушы бұл жолы да жазасыз қалған жоқ. Оған қатысты ұсақ бұзақылық бабы бойынша әкімшілік хаттама толтырылып, ресми түрде ескерту жасалды. Сонымен қатар, жәбірленушінің қауіпсіздігін қамтамасыз ету мақсатында 30 тәулік мерзімге қорғау нұсқамасы шығарылды. Ендігі кезекте ерекше баласы бар отбасы өз үйінде алаңсыз ұйықтап, қауіпсіз ортада өмір сүре алады.
