Айнұр Тұрсынбаева өзін «Жалмауыз» деп атаған Имашевқа жауап берді

Айтыскер ақын Балғынбек Имашев әлеуметтік желідегі парақшасында Айнұр Тұрсынбаева туралы қалжың жазба жариялады, деп жазды Aikyn.kz. Ол әріптесін туған күнімен құттықтаған. «Майдың бірі - Айдың Нұры! Мен үшін мамырдың бірі Бірліктің, Халықтар достығының, Ынтымақ т.б. мереке емес! Бұл күн - 35 жылдық қарсыласым, Жалмауыз, Мыстан, Кобра, Анаконда, Шаян, Бүйі, Жезтырнақ, Коуч, Мотиватор, Псих(олог) тағы қандай өнері бар еді, қысқасы, Айнұр досымның туған күні! Әкесі алапат өнер иесі, Анасы ғаламат мейірім иесі, сіңлісі керемет қабілетті, бауырлары керемет әділетті, қызы қылықты, ұлы білікті, қысқасы, керемет отбасыдан осындай да «нашар» адам шығады екен-ау», - деп қалжыңдады Балғынбек Имашев. Ол досының жақсы қасиеттерін атап өтті. «Хадисте әйелге төрт нәрсесіне қарап үйленуге болады дейді ғой: тегіне, сұлулығына, байлығына және иманына. Туған күнінде жамандай бермей, сол төрт критерий бойынша досым туралы шындықты айтайын. Тегіне келсек мін жоқ. Найманның қызы, оның ішінде Қаракерей, оның ішінде Мұрын (әрі қарай Кеңсірік, Мұрынбоқ деп тереңдемей-ақ қояйын) болып кете береді. Ақынмын деп жүргендердің көбі найманның қыздарының шаңына да ілесе алмайды. Сөз жоқ оны мойындау керек! Сұлулығына келсек, «Атты шал қайырылып үш қарардай» деп Мұхамеджан оның қыз кезін сипаттаған. Кемпір болғанда да жаяу жүрген жастар өңі мен автосалонына бола емес, желі мен чатқа саларына болса да лайк басардай көркі бар. Ал макияж-сакияж, ботекс-мотекс дегенді мен түсінбеймін. Әр еркектің өз уайымы болады, Әр Еркенің өз Райымы болады», - дейді ол. Оның бұл ерекше құттықтауына Айнұр Тұрсынбаева «Мынау мақтау ма, даттау ма?! Сволыш десе...» деп жауап жазған.