Нью-Йорк билігі қала мен штат аумағындағы сәулетті баспана иелері үшін жаңа салық түрін енгізуді жоспарлап отыр. Мэр Зохран Мамдани мен губернатор Кэти Хокулдың бастамасымен әзірленген заң жобасы құны 5 миллион доллардан асатын, бірақ бос тұрған жылжымайтын мүлік иелерін нысанаға алды. Бұл тізімге Нью-Йорктен тыс жерде тұрақты мекенжайы бар бірнеше қазақстандық та ілігуі мүмкін деп хабарлайды ozgeris.info сайты.
Нью-Йорктің жаңа заңына сәйкес, құны 5 миллион доллардан асатын пәтері бар, бірақ онда тұрақты тұрмайтын тұлғаларға қосымша қаржылық жүктеме артылмақ. Бұл тізімнің басында экс-судья Сайлаубек Жақишевтің ұлы Әділжан тұр. Оның меншігіндегі Манхэттен мен Вест-Сайдтағы екі нысанның жалпы құны дәл осы межеден асады. Кезінде пара алғаны үшін сотталған қазының әулеті енді америкалық бюджетті толтыруға мәжбүр болуы мүмкін.
Сонымен қатар, белгілі кәсіпкер Сержан Жұмашов та бұл салықтың «қармағына» ілігуі ықтимал. Оның 2010 жылы сатып алған 172 шаршы метрлік пәтері бүгінде құнын еселеп өсіріп, 5 миллион долларлық шектен асып кеткен. Сыбайлас жемқорлыққа қарсы қызметтің бұрынғы басшыларының бірі Нұрлан Шабдардың жұбайы мен қызына тиесілі екі қабатты пентхаус та назардан тыс қалмады. «Копталған еменнен» жасалған едені бар, Ист-Ривер өзеніне қарайтын бұл сәулетті баспана да жаңа заңның талаптарына толық сәйкес келіп тұр.
Салық төлеушілердің қатарын «Олимп» букмекерлік кеңсесінің бұрынғы қожайыны Анарбек Жауиров та толықтыруы мүмкін. Оның Манхэттендегі 6,5 миллион долларлық пәтері жалға беріліп келгендіктен, иесінің онда тұрмайтыны анық. Ал Болат Назарбаевтың мұрагерлері мен Виктор Храпунов бұл салықтан құтылып кетуі ғажап емес. Олардың иелігіндегі мүліктер не белгіленген құнға жетпейді, не әбден тозып, құндылығын жоғалтқан. Сол сияқты Даурен Жақсыбековтің де пәтері белгіленген шектен екі есе арзан болып шықты.
Нью-Йорк мэрі Зохран Мамданидің бұл қадамы қаладағы баспана нарығын реттеуге бағытталған. Ал қымбат салықтан қашқан кейбір шенеуніктер мен кәсіпкерлер қазірден бастап басқа елдерден, тіпті Албаниядан азаматтық алу сияқты балама жолдарды іздестіре бастаған көрінеді.
