Солтүстік Қазақстан облысында халқы аз 45 ауылды көрші елді мекендерге қосу жоспарлануда, деп хабарлайды ozgeris.info.
Аймақтағы 11 ауданға қарасты ауылдарға жүргізілген тексеру нәтижесінде 45 елді мекеннің болашағы жоқ деп танылған. Оның жетеуінде тұрғындар мүлде жоқ, ал қалған ауылдарда 10-нан аз адам тұрады.
Мысалы, Красноперовка ауылында қазір тек екі адам тұрып жатыр. Бір кездері 120 отбасы қоныстанған ауыл бүгінде қаңырап қалған. Соңғы сегіз жылда мұнда тек екі көрші ғана қалған. Ауылда электр жарығы былтырдан бері жоқ.
«Бұрын мұнда 12 мың бас мал болды, жақсы жалақы, жұмыс бар еді. Барлығы 90-жылдары тоқтады, мектеп жабылды, жұмыс та жоқ. Сол кезде ауыл халқы тарап кетті,» – дейді ауыл тұрғыны Атлас Файрушин.
Облыс әкімдігінің мәліметінше, жойылатын ауылдар не үлкен елді мекендерге қосылады, не картадан мүлдем өшіріледі. Қалған тұрғындардың жағдайы өзгермейді, олар тек жаңа әкімшілік атаумен өмір сүреді.
Қазақстан заңнамасына сәйкес, халқы 50-ден аз ауылдар жойылуға жатады. СҚО-да мұндай 141 ауыл бар, ал жалпы облыста 635 елді мекен тіркелген. Соңғы жылдары мұнда 160 ауыл жойылған.
Бұл қадамдар ауылдардағы әлеуметтік және экономикалық жағдайды оңтайландыруға бағытталған.
Ақпарат 24.kz сайтынан алынған.