Қазіргі заман мұғалімі қандай? Оқушылардың сабаққа деген ынтасын қалай арттыруға болады? Осы және өзге де сұрақтарға жас маман, қазақ тілі мен әдебиеті пәнінің мұғалімі Мәулен Алсай жауап берді.
– Мәулен мырза, бұл мамандықты таңдауыңызға не түрткі болды?
– Осыдан екі жарым жыл бұрын мойныма үлкен жүкті артып алғанымды түсінген жоқпын. Мектепте қырық жыл қызмет еткен атам жайлы әңгімелерді, күйбең тірліктен кеш босап, түннің ортасына дейін көз майын тауысып, сабағына дайындалатын анамды, басы қосылса “мектепті” сөз қылатын туыстарымды естіп, көріп өссем де мұғалімдіктің соншалықты соқпағы ауыр да күрделі екенін білмеген екенмін. Санап қарасам, әулетімізде 20 шақты мұғалім бар. Бәлкім, ең алдымен, туған-туыстарымның өз мамандығына деген ерекше ықыласы әсер еткен болар. Бүгінде өз мамандығыммен мақтанамын!
– Осы аз уақыттың ішінде не түйдіңіз? Педагог болудың қиындығы неде екен?
– Әр оқушының жүрегінен орын алу, көңілінен шығу оңай емес. Бүгінгі Z ұрпақ бұрынғы бағдарлама бойынша әзірленген сабаққа қызықпайды. Олардың ынтасын ашу үшін жаңа әдістерді ойлап табуыңыз керек. Бір әдісті бірнеше рет қолдана алмайтыныңыз тағы бар. Оқушыларға ойын технологиясын қолданған тиімді әсер етеді. Жалпы мұғалімдіктің шығармашылықты, жан-жақтылықты, ұшқырлықты қажет ететінін түсіндім. Сондай-ақ бала жанын түсіну үшін психолог болуыңыз маңызды. Мысалы, кез келген сыныпта көбіне соңғы партада отыратын, сабақ оқығысы келмейтін, тапсырманы орындауға құлқы жоқ,көп сөйлемейтін оқушылар болады. Еститіні — ұрыс, жазасы — төмен баға. Былайша дұрыс сияқты. Бірақ, тәрбиелеу – ұрысу мен жазалау емес. Бұл тек мұғалімнің жауапкершіліктен қашуы. Сыртқа шығарып сөйлемегенмен, сол оқушының ішінде үлкен арманның сайрап жатқанын біле бермейтініміз өкінішті.
– Өзіңіз сабақ барысында қандай-әдістерді қолданасыз?
– Жаңа сабақты түсіндіргенде әр ракурстан талдатуға тырысамын. Сыни эссе жазғызуды әдетке айналдырдым. Бұдан бөлек, қолдап-қолпаштау, ойын ойнату секілді түрлі әдісті қолданамын. Инновациялық технологиялармен жұмыс істеймін.
– Жаңа ғасыр мұғалімдеріне қандай кеңес бересіз?
– Оқушыларым – менің ұстаздарым! Олардан көп дүниені үйреніп жатырмын. Барша мұғалімге шәкірттеріңіздің ішкі жан дүниесін түсініп, тыңдай біліңіз деп айтқым келеді. Әріптестерімнің «Оның әр сабағы – ашық сабақ» дейтін дәрежеге жеткенін қалаймын. Ізденуден жалықпаңыздар!
– Әңгімеңізге рақмет! Сәттілік тілейміз!