Полиция қызметкерлері деструктивті-діни ағым жақтаушысын Жетісай қаласында ұстады.
Түркістан облысы Полиция департаменті бастығының орынбасары Қ.Саховтың айтуынша, жедел-іздестіру іс-шараларын Түркістан облысы Полиция департаментінің экстремизмге қарсы іс-қимыл басқармасының қызметкерлері мен ұлттық қауіпсіздік комитеті бірлесіп жүргізген.
Бұрын бірнеше рет сотталған 58 жастағы ер адам мессенджерде чат құрып, онда радикалды уағызшылардың бейнематериалдарын жариялап отырған. Сондай-ақ, тыйым салынған деструктивті-діни ағым идеологиясын насихаттайтын хабарламалар таратқан.
«Жедел уәкілдер ІІО-да есебінде тұратын күдіктіні Жетісай қаласынан ұстап, уақытша ұстау изоляторына қамауға алды. Қылмыстық іс қозғалды. Тиісті сараптамалар тағайындалды. Қазіргі уақытта күдіктінің тұрғылықты жері бойынша тергеу әрекеттері жүргізіліп жатыр. Оқиғаның толық мән-жайы анықталуда» - деді Қ.Сахов.
Фото: pexels.com
