«Қазгидромет» синоптиктерінің хабарлауынша, қарашаның алғашқы күндерінде ел аумағында ауа райы күрт өзгереді. Бұған дейін жылы әрі күншуақты ауа райын қамтамасыз еткен антициклонның орнына солтүстіктен суық циклон келеді деп хабарлайды Оzgeris.info сайты Tengrinews.kz сайтына сілтемемен.
Суық ауа массалары әсерінен жаңбыр біртіндеп қарға айналып, 4 қараша күні солтүстік және шығыс өңірлерде қарлы боран соғады. Кей аймақтарда жел күшейіп, көктайғақ болуы мүмкін.
Ауа температурасы айтарлықтай төмендейді: түнде –5…–13 градус аралығында, ал күндіз –3…–11 градус шамасында болады.
Циклонның әсері оңтүстік облыстарға да тарайды. 4 қарашада жаңбыр мен сулы қар жауып өткен соң, мұнда да күн салқындайды: түнде сынап бағанасы –13 градусқа дейін түсіп, күндіз +5 градустан жоғары көтерілмейді.
