Павлодарда TikTok трендін қайталаған оқушыны мұғалім ұрып жіберді (ВИДЕО)

Павлодар қаласындағы мектептердің бірінде TikTok-тағы трендті қайталаған оқушыны мұғалім ұрып жіберді, деп хабарлайды ozgeris.info. Әлеуметтік желілерде таралған видеода оқушы сабақ үстінде партаға шығып, айқайлап жатқан сәті түсірілген. Мұғалім оны тыныштандыруға тырысқанымен, оқушы әрекетін тоқтатпаған. Нәтижесінде физика пәнінің мұғалімі ашуға беріліп, оқушының ішіне соққы жасайды. Қалалық білім беру басқармасының хабарлауынша, оқушы сабақ үстінде сыныптастарымен бәстесіп, TikTok-тағы трендті қайталауға тырысқан. Бұл жағдай мұғалім мен оқушы арасында шиеленіске алып келген. Оқиғадан кейін мектеп әкімшілігі мұғаліммен еңбек шартын тоқтатты. Сонымен қатар қызметтік тексеру жүргізіліп, оқушымен және оның ата-анасымен профилактикалық жұмыс жүргізілді. Білім басқармасы хабарлағандай, оқушының анасы мұғалімге ешқандай шағым түсірмеген. Мұндай жағдайлар жасөспірімдер арасындағы тәртіпті сақтау мен мұғалімдердің кәсіби этикасын сақтау мәселесін қайта көтерді.