Жәнібек Әлімханұлы АҚШ-та «хитке» айналды

Орта салмақта WBO және IBF нұсқалары бойынша әлем чемпионы, қазақстандық Жәнібек Әлімханұлының екі жекпе-жегі АҚШ-тың ESPN телеарнасында нағыз хитке айналды. Бұл кездесулерді жалпы саны 1,3 миллионнан астам көрермен тамашалаған, деп хабарлайды Sports.kz. Brunch Boxing аналитикалық порталының мәліметінше, Әлімханұлының Стивен Батлермен жекпе-жегі ESPN телеарнасындағы ең танымал төрт кездесудің қатарына еніп, 714 мың көрілім жинаған. Ал Винченцо Гуальтьеримен өткен айқасын 600 мыңнан астам жанкүйер тамашалап, ол сегізінші орынға тұрақтады. Дереккөзге сүйенсек, ESPN телеарнасында ең көп қаралым жинаған жекпе-жек – америкалық ауыр салмақ өкілі Джаред Андерсонның Чарльз Мартинмен кездесуі (809 мың көрермен). Екінші орында Шакур Стивенсон мен жапондық Суичиро Йошино арасындағы айқас (804 мың көрілім), ал үшінші орын Джош Тейлор мен Теофимо Лопес арасындағы жекпе-жекке бұйырды (781 мың көрілім).