Ozgeris.info сайтының хабарлауынша, Ресейлік кәсіпкер Шалва Чигиринскийдің айтуынша, 2009 жылы Қазақстанның сол кездегі президенті Нұрсұлтан Назарбаев үшін Оңтүстік Франциядан сәнді жылжымайтын мүлік сатып алу әрекеті болған.
Кәсіпкердің сөзіне қарағанда, делдалдар шамамен 500 миллион АҚШ долларын ұсынып, ерекше талаптары бар зәулім вилла іздеген. Олардың талабы бойынша, резиденцияда тікұшақ қонатын алаң, екі бірдей бассейн, қонақтарға арналған жеке үй, онда да бассейн, сондай-ақ көптеген жатын бөлме болуы тиіс еді. Бұдан бөлек, нысан 3,5 гектар жер телімін қамтып, Монакоға жақын орналасуы шарт болған.
Чигиринскийдің айтуынша, аталған виллада тіпті бомбаға қарсы паналау орны да бар еді. «Мен оны кейіннен шарап жертөлесіне айналдырдым. Бірақ бастапқыда ол (Назарбаев үшін) қажет деп есептелген болуы керек», – деп еске алды кәсіпкер.
