Жетісу облысында қызметтік борышын өтеу кезінде қаза тапқан азаматтық қорғау майоры Дамир Тарановтың есімі ұлықталды. Президент жарлығымен қиылған «Ерлігі үшін» мемлекеттік марапаты бүгін марқұмның туған-туыстарына табыс етілді деп хабарлайды ozgeris.info сайты.
Аймақ басшысы Бейбіт Исабаев батырдың жақындарына барып, мемлекеттік марапатты салтанатты түрде тапсырды. Облыс әкімі елдің тыныштығы мен қауіпсіздігін күзеткен құтқарушылардың еңбегі әрдайым жоғары бағаланатынын жеткізді. Осы орайда сала мамандарының қауіп-қатермен бетпе-бет келіп, ел игілігі үшін атқаратын жұмысына айрықша тоқталды.
Оқиғаның мән-жайына сүйенсек, Дамир Таранов осы жылдың наурыз айында Алтынкөл көлінде бақытсыз жағдайға тап болған балықшыны құтқару кезінде жан тәсілім еткен. Ол 2016 жылдан бастап өртке қарсы қызмет саласында табанды жұмыс атқарып келді. Панфилов ауданындағы өрт сөндіру бөлімдерінде жауапты лауазымдарды атқарып, мамандығына адалдық танытты.
Жетісу облысы әкімінің баспасөз қызметі таратқан мәліметке сай, бұл марапат майордың өшпес ерлігі мен қаһармандығының нақты дәлелі болмақ. Өз өмірін өзге жанның амандығы жолында құрбан еткен ер есімі ел жадында мәңгі сақталады.
