Alatau City Bank ресми түрде 50 млрд теңге көлеміндегі мемлекеттік қолдауды жоспарланған мерзімінен бұрын қайтаратынын хабарлады. Бұл шешім банк тарапынан өзінің облигацияларын мерзімінен бұрын сатып алу арқылы жүзеге асырылады. Ақпарат Қазақстан қор биржасының (KASE) сайтында жарияланды, деп жазады Ozgeris.info.
Жарияланған деректерге сәйкес, банк 20 млрд дана номиналы 1 теңгелік облигацияны және 30 млн дана әрқайсысы 1 мың теңге тұратын бағалы қағазды толық көлемде қайта сатып алады. Банк өкілдері бұл қадамды мемлекеттік қаражатты мерзімінен бұрын қайтару бастамасы аясында жасап отырғанын атап өтті.
Бұл алғашқы жағдай емес. Бұған дейін, 2024 жылдың сәуір айында Alatau City Bank мемлекетке 100 млрд теңге көлеміндегі қаржылай көмекті де мерзімінен бұрын қайтарған еді. Сарапшылардың пікірінше, мұндай шешім банк тұрақтылығының артқанын және қаржылық жағдайының жақсарғанын көрсетеді.
