Ғылым және жоғары білім министрі Саясат Нұрбек ҰБТ-да талапкердің компьютеріне онлайн қосылып, жоғары балл алуға көмектескендер мәселесіне түсінік берді, деп хабарлайды «Өзгеріс» мотивациялық, ақпараттық-сараптамалық порталы.
«Біз Ұлттық қауіпсіздік комитетімен өте тығыз жұмыс істейміз. Өздеріңіз білетіндей, тест тапсырмалары мен олардың мазмұны «Мемлекеттік құпия туралы» заңның объектісі саналады. Сондықтан мұнда ҰҚК тергеу жүргізеді. Биыл барлық өңірде комитеттің департаменттері тікелей бақылау жүргізді. Біздің ұлттық тестілеу орталығының өкілдерімен бірге жұмыс істеді», — деді министр БАҚ өкілдерінің сауалына Үкімет отырысынан кейін.
Ведомство басшысы тексеру барысында жүздеген олқылық әшкере болғанын атап өтті. Нақты саны әлі де анықталуда.
«Соңғы мәліметке сай, 300-ден астам талапқа сәйкес келмеу фактілері анықталды. Осы жағдайлардың әрқайсысы бойынша ҰҚК және Ұлттық тестілеу орталығының өкілдерімен бірлесіп, қосымша тергеу жүргізіледі. Егер ақпарат расталса, онда балл жойылады. Егер осы уақытқа дейін талапкер грант иегері атанып үлгерсе, онда ол оны кейін қайтарады. Тиісінше, грант қайта үлестіріледі. Қыркүйек айында нақты белгілі болады. Ең жоғары балл жинаған, бірақ грант алмаған үміткерлер арасында осы гранттар қайта бөлінеді», — деп түйіндеді Саясат Нұрбек.
Министрдің сөзінше, мәселенің нақты мән-жайы анықталып, нәтижесі қыркүйек айының ортасына қарай жарияланады.