Ота жасатудан шаршаған әнші Серікбол Сайлаубек алғаш рет елге көзін көрсетті, деп хабарлайды «ozgeris.info».
Бұл туралы әнші “Опмай-опмай” бағдарламасында айтты. Белгілі болғандай, әншінің бір көзі туғаннан көрмейді, ал екіншісі шамалап ғана көреді екен. Оң жақ көзіне төрт рет ота жасатқан.
“Бір көзім мүлде көрмейді, тек екінші көзіммен көріп келдім. Оның өзі 30 пайыз ғана көретін. Енді осы 4-отадан соң 80 пайызға жуық көруі керек. Бәрін Алла біледі ғой. Солай тілеп отырмын. Бір көзіме хрусталь салып, бірнеше жыл сонымен жүрдім. ЖАстықпен балалармен төбелестім, сол кезде мұрным сынып, хрусталь тайып кетті. Оның орнына силикон салды. Мұндайда мүлде ауыр көтеруге болмайды. Тез қимылдар жасауға болмайды. Бірде үлкен қызымды көтерем деп силиконды орнынан тайдырып алдым. Енді силиконды алып тастау керек болды”, – деді әнші.
Серікбол Сайлаубектің көзіне екпе салып жатқан видеосы желіде тарады. Онда әнші қанша ауыр болса да, шыдамдылық танытып тұр. Әнші жалпы өз күтіміне, көзге ота жасатудан шаршағанын айтады. Себебі отаға дайындау, отадан кейін күтіну оңай емес. Одан кейінде үнемі сақтықты қажет етеді.
“Шынымды айтсам шаршадым, ота жасағаннан, көзімді емдегеннен шаршайсың. Бірақ амал жоқ, өмір бойы күресу керек. Сахнаға шығу керек. Мен мынадай денсаулықпен басқа еш жерде жұмыс істей алмаймын. Сондықтан өнерден алыстамаймын деп ойлаймын. Балам бар, анам бар, оларды асырау керек”, – деді ол.
Әнші өзінің қалын сұрап келген, дұға тілеп жатқан барлық ағайын-туыс, дос-жарандарына, жақындарына, қазақ халқына алғысын айтты.
«ozgeris.info»