Жахан Отарғалиев: "Үш ай бойы Балжанды көндіре алмадым"

Танымал актер, әзілкеш Жахан Отарғалиев Instagram парақшасында әнші Балжан Бидашпен қарым-қатынасы туралы айтып, оқырмандарынан ол тақырыпты қозғамауды өтінді. Актер ұзақ уақыттан бері әлеуметтік желіге ат ізін салмай кеткен еді. “Достар, мен қайтып келдім. Түркияның Стамбұл қаласында ем алдым. Бір айда екі рет ота жасалды. Дәрігерлердің арқасында аман қалдым. Денсаулықты күтіп, позитивте өмір сүрейік. Әлеуметтік желіні де ұмытып қалыппын”, – дейді әзілкеш-блогер. Ол жеке өмірі жайында да әңгіме қозғап, Балжан Бидашпен қарым-қатынасы туралы сұрақтарға нүкте қойды. “Осы күнге дейін отбасым туралы әңгіме қозғамадым. Бірақ жанашыр достарым, оқырмандарым: “Отбасыңды сақта, Балжанды қайтар” деп жатыр. Соларға арнап айтқым келеді: Мен отбасымды сақтап қала алмайтындай ақымақ емеспін. Балжанды үш ай бойы көндіре алмадым. Ажырасу – менің жек көретін тақырыбым. Осы күнге дейін не нәрсе істесем де, отбасым үшін жасадым. Оған да уақыт бердім. Өзгеріп, қателіктерімізден сабақ алайық дедім. Үш ай бойы қолымнан келгенін жасадым. Бірақ нәтиже болмады. Сол екі аралықта ауырып қалып, шұғыл Түркияға ота жасатуға кетіп қалдым. Ол жақта да жүрегім тыныш болмады. Сіздерге айтарым, отбасын сақтай алмайтын еркектердің қатарынан емеспін. Осыны түсініңіздер! Бір-біріміз туралы жаман ойдан аулақ болайық!”, – сөзін түйіндеді актер.