Елордада қатты тұрмыстық қалдықтарды жинау мен шығару тарифін көтеру мәселесі талқылануда. 2019 жылдан бері бұл көрсеткіш адам басына айына 390 теңгені құрайды. Әкімдіктің мәліметінше, соңғы бес жылда қоқыс шығаруға жұмсалатын шығын екі еседен астам өскен. Жаңа тариф абаттандырылған сектор үшін 637 теңге, ал абаттандырылмаған сектор үшін 679 теңге болуы мүмкін.
Астана қаласы қоршаған ортаны қорғау және табиғатты пайдалану басқармасының басшысы Дәулет Доскұловтың айтуынша, тарифті қайта қарау қажеттігі қоқысты шығару мен кәдеге жарату шығындарының өсуімен, сондай-ақ қалдықтардың көлемі мен оларды өңдеу шығындарының артуымен байланысты.
«Қолданыстағы тариф адам басына айына 390 теңгені құрайды. 2019 жылдан бері бұл көрсеткіш өзгермеген, ал Алматыда ол 718 теңгеге жетті. Елдегі халық саны орта есеппен 300 мың болатын алты шағын қалада тариф 400–500 теңгеге дейін өсті», – деді ол.