Түркістан облысының тұрғыны Жәнібек Әбілхан Ұлттық бірыңғай тестілеуден 140 балл жинап, үздік нәтиже көрсетті, деп хабарлайды ozgeris.info.
Жәнібек Ордабасы ауданы, Темірлан ауылындағы Уәлиханов атындағы мектеп-гимназияның 11-сынып оқушысы. ҰБТ-да бейіндік пән ретінде информатиканы таңдаған.
"Жәнібек — көпбалалы отбасынан шыққан, зерек әрі білімге құштар оқушы. Бұл жетістік – оның табандылығы мен жүйелі еңбегінің нәтижесі", – деді облыс әкімдігіндегілер.
Айта кетейік, биылғы ҰБТ 16 мамырда басталды және 7 шілдеге дейін жалғасады. Талапкерлер тестілеуді екі рет тапсырып, үздік нәтижені грант конкурсына ұсына алады. Биыл тестілеуге 216 мыңға жуық түлек өтініш берген, бұл өткен жылмен салыстырғанда 30 мыңға көп.
