Шенеунік су тасқынына бөлінген қаражатты өз пайдасына жаратқан

Ойыл ауданында су тасқыны салдарынан орын алған қиын жағдайды пайдаланған шенеунікке қатысты сот үкімі шықты. Ол төтенше жағдай кезінде екі мәрте пара алғаны үшін кінәлі деп танылды, деп хабарлайды ozgeris.info. 42 жастағы Айнат Қазмағанбетов биыл наурызда Ойыл аудандық архитектура, құрылыс, ТКШ және автомобиль жолдары бөлімінің басшысы болып тағайындалған. Алайда сәуір айында су тасқынына бөлінген қаражат есебінен пара алу әрекеті әшкере болды. Су тасқыны ауданның үйлері мен жолдарын зақымдап, электр желілерін құлатты. Төтенше жағдай жарияланған соң, арнайы техникалық тексеріс пен қалпына келтіру жұмыстары үшін мердігер компаниялармен келісімдер жасалған. 5 сәуірде «Жоба НС» ЖШС-мен техникалық құжаттама әзірлеу бойынша шарт жасалған. Қазмағанбетов бұл келісім үшін мердігер компаниядан 100 мың теңге көлемінде пара талап еткен. Мердігер ақшаны шенеунікке жұмысы аяқталғаннан кейін аударған. Осыдан кейін жаз мезгілінде Қазмағанбетов тағы бір мердігерден 500 мың теңге пара алған. Бұл жолы ол «BaitanatStroy» ЖШС-мен электр желілерін қалпына келтіру туралы келісімшарт жасағаны үшін 10% сыйақы талап еткен. 15 қараша күні Ақтөбе қаласының қылмыстық істер жөніндегі соты Айнат Қазмағанбетовті кінәлі деп танып, оған 21 миллион теңге айыппұл салды. Сонымен қатар, оған мемлекеттік қызметте жұмыс істеуге өмір бойы тыйым салынды. Мердігерлердің бірі де қылмыстық жауапкершілікке тартылды. Ол пара бергені үшін 10 миллион теңге айыппұл төлеуге міндеттелді. Сот үкімі әлі заңды күшіне енген жоқ. Ақпарат diapazon.kz сайтынан алынған.