Қызылорда облысында «Дарын» қосымша білім беру орталығындағы былық әшкере болды. Тергеу мәліметтері бойынша, мекеменің бас есепшісі қызметкерлердің жалақысы мен іссапарларға арналған шығындарды өзіне аударып отырған. Осылайша жымқырылған соманың жалпы көлемі -50 миллион теңге.
«Аталған дерек бойынша облыс прокуратурасымен ҚР ҚК-нің 189-бабы 4-бөлігінің 2) тармағымен қылмыстық іс тіркелді. ҚР ҚПК-нің 201-бабының талаптарына сәйкес өзге ақпарат жариялануға жатпайды», — делінген облыстық прокуратура хабарламасында.
Елімізде білім беру мекемелерінде бюджет қаражатын жымқыру жағдайлары соңғы уақытта жиі кездеседі. Мысалы Жетісу облысында Сарқан ауданы білім бөлімінің бас бухгалтері 1 миллиард теңгеден астам ақшаны иемденген. Тергеу барысында ол 156 миллион теңге қайтарды. Күдікті қамауға алынды.
Маңғыстау облысында ұлттық спорт түрлері бойынша облыстық орталықтың бас есепшісі 2018-2023 жылдар аралығында 117 миллион теңгені қолды қылған. Мекеме басшысына рақымшылық жасалды. Ал бас есепші 7 жылға сотталып кетті.
Былтыр агенттік білім беру саласында 206 қылмыстық істі тіркеді. Олар бойынша залал 14 млрд теңгеден асты. Жалпы, жымқырудың ең үлкен сомасы Түркістан, Жетісу, Қызылорда, Алматы, Ақтөбе облыстарында және Алматы қаласында анықталды. Жымқыру фактілері анықталуда.