Павлодарда такси өртеніп, балалар мен жолаушылар зардап шекті

Павлодар қаласында такси ішінде болған өрт салдарынан бес адам, соның ішінде екі бала жарақат алды. Жолаушылардың бірі жансақтау бөлімінде жатыр, деп хабарлайды ozgeris.info сайты Tengrinews.kz сайтына сілтемемен. Оқиға 24 мамыр күні сағат 21:37-де Олжабай батыр көшесінде тіркелген. Жүріп келе жатқан көлік кенеттен өртеніп кеткен. Оқиға орнына келген өрт сөндірушілер жалынды дер кезінде ауыздықтап, жарылыстың алдын алды. Төтенше жағдайлар департаментінің мәліметінше, бес адамға, оның ішінде екі балаға шұғыл медициналық көмек көрсетілген. Төрт адам ауруханаға жеткізілді. Денсаулық сақтау басқармасының мәліметіне сәйкес, 1992 жылы туған әйел үшінші дәрежелі күйікпен жансақтау бөліміне түсті. Екі қыз бала – 2 және 9 жаста – облыстық балалар ауруханасына жатқызылды. Кішкентай қыздың денесінің 18 пайызы, ал үлкенінің 7 пайызы күйіп қалған. Қазіргі таңда балалардың жағдайы тұрақты. Сондай-ақ, 34 жастағы такси жүргізушісі қолынан жеңіл күйік алып, амбулаторлық емдеуге жіберілді.