Өскемен тұрғындары тағы да ауа сапасына қатысты дабыл қағуда. Соңғы күндері әлеуметтік желілерде бірнеше шағын ауданнан таралған өткір химиялық иіс туралы шағымдар көбейді. Бұл жағдай қала халқының денсаулығына алаңдаушылығын тудырып отыр.
Ресми тексерістер мен халық күдігі
Халық лас ауаның кесірінен денсаулықтарына зиян келіп жатқанын айтады. Кейбір тұрғындар тамақтарының жыбырлап, ауырғанын, антибиотик қабылдауға мәжбүр болғанын жеткізді.
«Бір апта бойы емделіп шықтым, бірақ әлі де тамағым ауырсынып тұр», – дейді бір тұрғын.
Кейбіреулері экологиялық нормаларды бұзып отырған ірі кәсіпорындар мен олардың инвесторларын жауапқа тартуды талап етуде.
ШҚО Экология департаменті бұл шағымдарға қатысты тексеріс жүргізіп, атмосфералық ауаның аспаптық өлшеуін өткізді. Бірақ тексеріс нәтижелері ауада ластаушы заттардың шекті рұқсат етілген концентрациядан аспағанын көрсетті. «Қазгидромет» РМК филиалының мәліметтері де ауаның ластанбағанын алға тартты. Алайда бұл деректер халықты сендіре алған жоқ. Себебі тұрғындар өздері сезіп отырған химиялық иісті нақты зерттеулермен салыстыра алмайды.
Биліктің әрекетсіздігі мен құқықтық жауапкершілік
Бұл бірінші рет болып отырған жағдай емес. Өткен қарашада хлорсутек деңгейі нормадан тоғыз есе асып кеткен кезде, қала тұрғындары бұл туралы кеш хабардар болды. Осыған байланысты жергілікті белсенді Алексей Божков әкімдікті сотқа берді. Ол биліктің әрекетсіздігі халықтың денсаулығына тікелей қауіп төндіретінін мәлімдеді.
«Егер мен бұны алдын ала білсем, баламды мектепке жібермей, өзім газ маскасын тағып алар едім. Бірақ бізге дер кезінде хабарланбады», – деп наразылық білдірді ол.
Сот әкімнің әрекетсіздігін заңсыз деп танып, билікке шығарындылар туралы ескерту жүйесін жақсарту міндетін жүктеді. Әкімшілікке жаңа экологиялық бақылау тетіктерін енгізу тапсырылды. Қала басшылығы бұған қалай жауап беретіні әлі белгісіз.
Тұрғындардың талабы – нақты шаралар
Өскемендіктер үшін бұл тек экология мәселесі емес, денсаулық пен өмір сапасына тікелей әсер ететін проблема. Билік пен кәсіпорындар нақты шаралар қабылдап, тұрғындарға дер кезінде шынайы ақпарат беруді жолға қоймаса, бұл наразылықтың тек күшейе беретін түрі бар. Жергілікті халық жай ғана уәде емес, нақты нәтиже талап етуде.