Араға жиырма жыл салып Моңғолия Президенті Ухнаагийн Хүрэлсүх Қазақстанға мемлекеттік сапармен келді. Бұл айтулы оқиғаны көршілес елдің БАҚ беттері тарихи сәт ретінде жарыса жазып жатыр. Көшпенділер мұрасы тоғысқан қос мемлекет арасындағы байланыс жай ғана дипломатиялық кездесу емес, екіжақты қатынастардың жаңа дәуірі ретінде бағалануда деп хабарлайды ozgeris.info сайты.
Монголияның жетекші басылымдары бұл сапарды байланыстың қайта жаңғыруы деп сипаттайды. Ендігі кезекте тек рәміздік кездесулер емес, нақты экономикалық қадамдар жасалмақ. Басты назарда – инвестиция тарту, логистиканы дамыту және тауар айналымын бірнеше есеге арттыру мәселелері тұр. Екі ел арасындағы ықпалдастық құрғақ сөзден нақты іске көшуді көздейді.
Моңғолия үшін көлік дәлізі – өміршең мәселе. Теңізге шығар жолы жоқ мемлекет ретінде олар Қазақстанды Каспий қайраңы мен Кавказ арқылы Еуропа нарығына жол ашатын стратегиялық көпір деп санайды. Бұл ретте Қазақстан сенімді серіктес қана емес, моңғол тауарларының әлемдік айдынға шығуына септігін тигізетін маңызды одақтасқа айналмақ.
Сонымен қатар, Улан-Батор сыртқы экономикалық байланыстарын әртараптандыруға баса мән беруде. Тек дәстүрлі бағыттармен шектелмей, Қазақстанмен энергетика, қаржы, ғылым және гуманитарлық салаларда ортақ жобаларды жүзеге асыруды жоспарлап отыр. Екі елдің тарихи тамырластығы мен мәдени жақындығы саяси диалогтың ашық әрі сенімді өтуіне берік негіз қалап отыр.
Бұл сапар Еуразия кеңістігіндегі екі ірі мемлекеттің ұзақ мерзімді әрі тұрақты бірлестігін құруға бағытталған нық қадам болмақ. Астанадағы жоғары деңгейдегі келіссөздер Орталық Евразияның болашақ бейнесін айқындай түспек.
