Рахат Тұрлыхановқа қатысты кезекті отбасылық жанжал заң шеңберінде өз шешімін тапты. Алматы қалалық полиция департаменті таратқан мәліметке сүйенсек, оның жұбайы бұрынғы уәждерінен бас тартып, ешқандай талабы жоқ екенін білдірген деп хабарлайды ozgeris.info сайты.
Осыған дейін Тұрлыхановқа қатысты қылмыстық іс қозғалып, тергеу амалдары жүргізілген еді. Тәртіп сақшылары оқиғаның мән-жайын жан-жақты зерделеп, қажетті материалдар мен айғақтарды түгел жинақтады. Тергеу барысында заң талаптарына сай барлық іс-қимылдар атқарылды.
Алайда шағым түсірген тарап істің ары қарай жалғасуына ниет білдірмеген. Жұбайы тергеу жұмыстарына қатысудан бас тартып, талап-арызын қайтарып алды. Осы жайтқа байланысты қылмыстық іс заңды негізде тоқтатылды.
Құқық қорғау органдары тұрмыстық қатынастарға қатысты әрбір жағдай жіті бақылауда болатынын қаперге салды. Полиция өкілдері азаматтардың құқығы мен қауіпсіздігін қорғау мақсатында тиісті шаралардың әрдайым қабылданатынын атап өтті.
