Қазақстанның ішкі жалпы өнімі (ІЖӨ) 2025 жылдың қаңтар-сәуір айларында 6%-ға өсті. Бұл туралы Ұлттық экономика министрлігі мен Ұлттық статистика бюросының алдын ала мәліметтері хабарлады. Экономиканың негізгі салалары, соның ішінде көлік, сауда, ауыл шаруашылығы және байланыс салаларында оң динамика байқалды, деп жазады Ozgeris.info.
Атап айтқанда, көлік саласында 22,4%-дық өсім тіркелді. Бұл көрсеткіш негізінен темір жол және құбыр арқылы жүк тасымалдау көлемінің артуымен қамтамасыз етілді. Түркістан (21,8%), Жамбыл (11,2%) және Абай (14,9%) облыстары көлік саласындағы өсім бойынша көш бастап тұр. Сауда саласы да тұрақты өсімді көрсетті.
Жалпы сауда көлемі 7%-ға артты, оның ішінде көтерме сауда 7,4%, ал бөлшек сауда 6,1%-ға өсті. Түркістан облысы жеміс, көкөніс және фармацевтикалық тауарларды сатудан 60,4% өсімге жетсе, Ақмола облысы астық, тұқым және мал азығын сатудан 44% өсімді қамтамасыз етті. Шымкент дизель отыны, фармацевтикалық өнімдер және металдардың қалдықтарын сатудан 19,8%-дық өсімге қол жеткізді. Өнеркәсіп саласында да оң динамика байқалды.
Жалпы өндіріс индексі 6,4%-ға өсті. Бұл көрсеткіштің басым бөлігі тау-кен саласына тиесілі, онда 7,1% өсім байқалды. Көмір өндіру 11,2%-ға артты. Өңдеу өнеркәсібінде көрсеткіш 7,2%-ға жетіп, оның ішінде тамақ өнімдері 12%, темекі 26,3%, химиялық өнімдер 11,2%, машина жасау 11,2% өсті. Ауыл шаруашылығында өсім 3,9%-ды құрады. Бұл саладағы оң динамика өсімдік және мал шаруашылығы өнімдерінің артуымен байланысты.
Үкіметтің мәлімдеуінше, мұнайдан тыс салалардағы өсім ел экономикасының тұрақтылығын қамтамасыз етуге бағытталған. Премьер-Министр Олжас Бектенов мұнайға тәуелділікті төмендету арқылы экономиканы әртараптандырудың маңыздылығын атап өтті. Құрылыс саласында нақты жұмыс көлемінің индексі 16,2%-ға жетті. Бұл сектордағы өсім негізінен инфрақұрылымдық жобалардың артуы және тұрғын үй құрылысындағы белсенділікпен байланысты. Жергілікті билікке құрылыс жұмыстарын уақтылы аяқтап, жобалар құнын бақылауда ұстау тапсырылды.