Ақтөбеде жылыту маусымына дайындық жұмыстары қарқынды жүргізілуде. Қала әкімі Азамат Бекет жылу жүйелерінің құбырларын ауыстыру жұмыстары жүріп жатқан көшелерде болды, жұмыс барысын бақылады. Осы тұста бейтаныс балақай келіп, әкімнің қолын алды, деп хабарлайды Ozgeris.info.
Қала әкімі Азамат Бекет бастаған жергілікті атқарушылар өз жұмыстарымен айналысып жүр. Кенеттен кішкентай бала келіп, еш саспастан әкімнің және оның жанындағылардың қолын алып, амандасады. Баланың бұл әрекеті видеоға түсіп қалып, aqtobe_akimat инстаграм парақшасында жарияланды. Оны көрген желі қолданушылары әкімнің жұмысынан бұрын, баланың әрекетіне сүйсініп пікір қалдырды.
«Сары бала жарады, айналасындағылардан сескеніп тұрған жоқ», «Мына видео көңіл-күйімді көтеріп тастады, сол жердің бригадирі емес пе?», «Барлығын түсініп отырмыз, сары бала кім?», «Сары бала пысық екен. Осындай балаларды дамыту керек», «Яриктің жүрмейтін жері жоқ», «Менің көршім ғой», деп жарыса жазды.