Алматы облысының тұрғындары қоқыс полигонын тазартуды талап етеді. Өйткені жағымсыз иіс ауылдарға тарап, халықтың тынысын тарылтқан, деп хабарлайды Ozgeris.info.
Бұған дейін қоқыс төгілген сәтте топырақ төселсе, қазір полигон ашық жатады дейді. Соның кесірінен қолаңса иіс тарап, бүтіндей бір ауылдық округке тарайды екен.
35 жыл бұрын пайдалануға берілген жер қалдық төгетін жерге айналған. Тіпті елдімекенде дерт көбейіп, жағдай жылдан жылға ушығып барады дейді халық.
“Балалар астма болып жатыр. Үстеріне түрлі жара шығады. Біз мұның неден екенін білеміз. Сонда әкім маған “сасық жақтан неге жер аласыздар?”, “Біздің әкімшіліктен ешқандай көмек жоқ”, – деп тұрғындар налуда.
“Бұл иіс 23 жылға дейін бұлай қатты шықпайтын. Ол кезде қоқыс төгілетін де, беті топырақпен жабылатын. Қазір бұл жерде қоқыстан терілетін түрлі заттар, соны теретін терімшілер бар. Сол теріп алғанша беті жабылмайды. Жабылғанға дейін біраз уақыт өтеді”, – деді Әйтей ауылының тұрғыны Серік Есболов.
Қоқыс полигонының басшылығы арнайы қоқыс төгетін 12 орын бар дейді. Сәйкесінше тұрмыстық қалдықтарға толған сәтте бір-бірден көміп отырады. Қаланың басым бөлігі мен Қарасай ауданынан тәулігіне 300-ге жуық жүк көлігі кіріп бір жарым мың тоннаға жуық қоқыс тастайды екен.
“2-3 компаниямен келісімшартқа отырғанбыз. Бұл жерде машина балондары келеді, пластмасса келеді, целлофан келеді. Оның бәрі арнайы көмілуге жарамайды. Өйткені олар шірімейді. Сол себепті арнайы компанияларды жалдап, он теріп бункерге салып, оны жібереміз”, – деді қ оқыс полигонының директоры Нұрланбек Иманбеков.
Тұрмыстық қалдықтарды өңдейтін зауыт құрылысы әлі қағаз бетіне де түспепті. Ауыл әкімдігі болса халықтан жазбаша шағым күтіп отыр екен.
“Қағаз жүзінде ондай ешқандай шағым түскен жоқ. Бірақ “келіңіздер, арыздарыңызды жазыңыздар, біз жоғары жібереміз, қараймыз” деп айттық”, – деді Әйтей ауылдық округі әкімінің орынбасары Әкімжан Жүнісов.