Бүгін ел қоржыны тағы бір Париж-2024 Паралимпиада жолдамасымен толықты.
Қазақстандық параспортшы Еркін Ғаббасов пара оқ атудан Әлем Кубогында екінші орын алып, Париж-2024 Паралимпиада ойындарының жолдамасын жеңіп алды.
Еркін R1 дисциплинасының жартылай финалында 7-орынға тұрақтап, финалға шықса, ақтық сында ол 246,8 ұпаймен жарыстың күміс жүлдесіне қол жеткізді. Ал, алтын медальды 249 ұпай жинаған кореялық Дж.Ли алса, үшінші орын 224.8 ұпай жинаған грекиялық спортшы С.Галогавросқа бұйырды.
«Пара оқ атудан әлем кубогының ережесі бойынша жартылай финалда 1-8 орынға тұрақтаған спортшылар финалға өтеді. Біздің спортшымыз финалда өзін жақсы көрсетіп, екінші орынға шықты. Алтын медальға тек 3 ұпай жетпей қалды. Жарыстың жеңімпазы кореялық Джангхо Ли-да Паралимпиада ойындарының жолдамасы болғандықтан, екінші орын алған қазақстандық спортшыға Париж-2024 лицензиясы беріледі. Осымен биылғы Паралимпиада ойындарына 11 лицензиямыз бар. Бұған дейін волейболды отырып ойнау құрамасы, пара каноэдан Спатай Бибарыс, пара жеңіл атлетикадан Дастан Мұқашбеков, пара пауэрлифтингтен Давид Дегтярев, пара жүзуден 3 спортшы, пара таеквондодан Камиля Досмалова, Нұрлан Домбаев және Нышан Өмірәлі алған болатын. Енді міне пара оқ атудан Еркін Ғаббасов байрақты додаға жолдама алып отыр. Паралимпиада ойындарына дейін лицензиат спортшылардың саны әлі артады деп сенемін», — деді Сұлтанбек Қаби Дене мүмкіндіктері шектеулі тұлғаларға арналған спорттық даярлау орталығының команда басшысы.
Айта кетсек, пара оқ атудан WSPS әлем кубогы Нью Делиде 6 наурызда басталған болатын. Жарыс 15 наурыз күні мәресіне жетеді. Жарысқа 49 елден 268 спортшы қатысып жатыр.
Фото: csp_parasport.kz