Талдықорғанда Шерзат Полаттың өліміне қатысты сот процесі барысында марқұмның анасы Гүлбара Бишимбиева қатысқан тергеу экспериментінің видеосы көрсетілді, деп хабарлайды ozgeris.info сайты Ulysmedia.kz порталына сілтеме жасап.
Бейнежазбада әйел айыпталушылар — Абзал Шынасыл мен Нұрбол Тоқтаубаев — өзіне баласына жақындауға кедергі келтіріп, тас лақтырғанын айтып, Шынасылдың өзін өлтірем деп қоқан-лоқы жасағанын жеткізеді.
– Абзал мен Нұрбол қолымнан ұстап, туыстарыма тас лақтыра бастады. Тастардың бірі енеме тиді. Мен айқайлап, жедел жәрдем мен полицияны шақыруды сұрадым. Сол кезде Абзал маған қарап: «Аузыңды жап, әйтпесе сені де өлтірем!» – деп ысылдап айтты. Кейін мен бәрібір босанып шығып, Шерзат пен Нұрғанатқа қарай жүгірдім, – дейді ол видеода.
Тергеу кезінде басты айыпталушы Абзал Шынасыл Гүлбара Бишимбиевамен беттестіруден бас тартқан. Оның айтуынша, оқиға орнында әйелді мүлде көрмеген. Сот барысында ол бұл қадамға Шерзаттың әкесі Қаржаубай Нұрымовтың қысым көрсетіп, тіл тигізгені себеп болғанын және адвокаты да солай кеңес бергенін айтты.
Айта кетейік, Абзал Шынасыл — Шерзат Полатты өлтіру ісі бойынша басты күдікті. Алайда сотта ол өз кінәсін мойындамай, жасөспірімді өлтірмегенін алға тартты.
