Астананың экологиясын жақсартатын жаңа бульвар ашылуда

Астанада Greenline бульварын абаттандырудың алғашқы кезеңі басталды деп хабарлайды ozgeris.info сайты Курсив сайтына сілтемемен. Бұл — қаланың жаңа «жасыл осіне» айналатын ауқымды экологиялық жоба. Құрылыс жұмыстары Күлтегін көшесі мен Анет Баба мемориалы аралығында жүріп жатыр. Greenline — елорданың басты нысандары «Хан Шатыр» мен «Бәйтерек» монументінен басталатын Нұра-Есіл бульварының табиғи жалғасы болмақ. Жоба аясында Төле би және Омаров көшелері жалғасып, әртүрлі аудандарды байланыстыратын біртұтас жасыл дәліз қалыптасады. Көгалдандыруға ерекше мән берілген: шамамен 1300 ағаш пен мыңдаған көпжылдық бұталар отырғызылады. Сондай-ақ жоба шеңберінде су айдындары, көлеңкелі аллеялар, балалар мен спорт алаңдары, веложолдар, жаяу жүргіншілерге арналған жолдар мен демалыс аймақтары салынады.