Украина президенті Владимир Зеленский және Франция, Германия, Польша мен Ұлыбритания басшылары сенбі күні Киевте өткен «қалау білдірушілер коалициясы» аясында АҚШ президенті Дональд Трамппен телефон арқылы сөйлесті, деп хабарлайды ozgeris.info сайты «Европейская правда» басылымына сілтеме жасап.
Украина сыртқы істер министрі Андрей Сибигидің айтуынша, тараптар бейбіт келісімге қол жеткізу жолдарын талқылаған. Оның мәлімдеуінше, Украина мен одақтастары дүйсенбіден бастап құрлықта, әуеде және теңізде кемінде 30 күнге атысты толық тоқтатуға дайын.
Сибигидің сөзіне қарағанда, егер Ресей келісіп, бітімді бақылау тиімді жүргізілсе, бұл тұрақты бейбіт келіссөздерге жол ашуы мүмкін.
Киевке сапар алдында Франция, Германия, Польша мен Ұлыбритания басшылары бірлескен мәлімдеме жасап, Ресейді 30 күнге атысты тоқтатуға шақырды. Бұған дейін Трамп та Зеленскиймен әңгімелесу барысында осындай бітімге қолдау білдіріп, егер шарттар бұзылса, АҚШ пен одақтастары жаңа санкциялар енгізетінін ескерткен.
Ал Ресей билігі шетелдік серіктестер Украинаға қару жеткізуді тоқтатпайынша, ұзақ мерзімді бітімге келіспейтінін мәлімдеді.