Қазақстандық жауынгер Шавкат Рахмонов Playboy журналының бұрынғы моделі Нина Мари Даниэльге қазақ тіліндегі ең ұзын әрі қиын сөзді үйретті. Бұл туралы KAZ.NUR.KZ Нина Мари Даниэльдің Х желісіндегі ресми парақшасына сілтеме жасап хабарлайды.
Сұқбат барысында Шавкат Рахмонов журналист-модель Нина Мари Даниэельге қазақ тіліндегі ең ұзын әрі қиын сөздердің бірі – «Қанағаттандырылмағандықтарыңыздан» деген сөзді дұрыс айтуды үйретуге тырысты. Даниэль сөзді бірнеше рет қайталап айтуға талпынғанымен, оны толық айтып шығу оңай болмады.
«Профессор Шавкат Рахмонов маған қазақ тіліндегі ең қиын сөзді айтуды үйретті, ха-ха. Мына сөзді кім жазып бере алады? Өтініш», — деп жазды Нина Х желісіндегі ресми парақшасында.
Айта кетейік, Шавкат Рахмонов қазір АҚШ-та алдағы жекпе-жегі қарсаңындағы соңғы дайындық кезеңін өткізуде. Ол 8 желтоқсанда Лас-Вегаста (АҚШ) өтетін UFC 310 турнирінде ирландиялық Иэн Гэрримен (15-0) кездеседі. Сондай-ақ The Ariel Helwani Show бағдарламасының продюсері Конор Буркс тымақ киіп, алғаш рет бешбармақтан дәм татқанын айтқан болатын.