Taldau Talks подкастында Қазақстандағы салық-бюджет саясатының реформасы талқыланды. Вице-премьер-министр Серік Жұманғарин мемлекеттік қаржының тұрақсыз екенін айтып, салық реформасы қажет екенін жеткізді.
«Өткен жылғы бюджет процесі мұны көрсетті. Бюджеттік бағдарламалар әкімшілері 32 трлн теңгеге өтінім берді, біз 26 трлн теңгені қанағаттандырдық. Әрине, одан да көп қысқартқымыз келді, бірақ секвестрленбейтін әлеуметтік шығындарға тірелдік. Біздің 98,9% шығындар секвестрлеуге жатпайды. Сондықтан сыншылар «шығындарды қысқартыңдар» дегенде – қысқартатын ештеңе жоқ», – деді Серік Жұманғарин.
Оның айтуынша, жуырда ЭКСПО-да өткен жиында шенеуніктер «қысқартуға не бар?» деген мәселені талқылаған.
«Шын мәнінде секвестрлеуге болатын қаражат – 350 млрд теңге шамасында, одан көп емес. Оның ішінде әлеуметтік шығындар және тағы басқа міндеттемелер бар», – деп толықтырды Жұманғарин.