2025 жылғы 26 ақпанда сағат 9:00-де Маңғыстау өнер колледжінің оқытушылары ұжымдық жиналыс өтетіні туралы хабарлама алды. Алайда белгіленген уақытта жиналыс белгісіз себептермен өткізілген жоқ. Күннің екінші жартысында оның қайта өтетіні жарияланды.
Жиналыс барысында Маңғыстау облыстық білім басқармасының басшысы А. Құмбаевтың бұйрығымен Дина Ғалымқызының қызметінен босатылғаны белгілі болды. Ол колледжде 17 жыл еңбек еткен, оның 10 жылында өндірістік практика жөніндегі директордың орынбасары, 7 жылында оқу ісі жөніндегі директордың орынбасары болған, ал 2024 жылдың қазан айынан бері колледж басшысының міндетін атқарған.
26 ақпаннан бастап оның орнына колледж директорының міндетін атқарушы болып Жанна Мейрамқызы Мырзагалиева тағайындалды. Бұл шешім колледж оқытушыларының 81%-ының наразылығын тудырды.
Сонымен қатар, 2025 жылғы 18 ақпанда Жанна Мейрамқызы «Академиялық вокал» бөлімінде «Педагогикалық практика» пәнінің оқытушысы ретінде жұмысқа қабылданғаны анықталды. Алайда 2025 жылға арналған штаттық кестеде мұндай бос жұмыс орны болмаған және бұл маманға қажеттілік туындамаған.
Осы жағдайға байланысты оқытушылар білім басқармасының басшысы А. Құмбаевтың атына хат жолдады, оны қарастыру 15 күнге созылады. 28 ақпанда олар ҚР Оқу-ағарту министрі Ғ.Б. Бейсембаевқа және Маңғыстау облысының әкімі Н.И. Кылыбайға бейнеүндеу жазды.
Коллектив қалыптасқан жағдай оқу орнының қалыпты жұмысына кедергі келтіріп, ішкі шиеленіс тудырып, міндеттерді толық орындауға мүмкіндік бермейтінін мәлімдеді. Осыған байланысты оқытушылар министр мен облыс әкімінен мәселені жеке бақылауға алып, мұқият тексеру жүргізуді талап етуде.