Киану Ривз хат жазса, таңғалмаңыз, бірақ сақтаныңыз…

Алаяқтық күннен-күнге түрленіп барады. Бұрын банк атынан хабарласатындар енді танымал адамдардың бейнесін жамылып, сенімге кіруге тырысады. Әлеуметтік желілер мен мессенджерлерде осындай қулықтар жиілеп кетті. Қостанайда болған соңғы оқиға осыған дәлел, деп дабыл қағады Ozgeris.info. 62 жастағы тұрғын TikTok желісінде белгісіз біреумен танысқан. Ол өзін әйгілі Голливуд актері Киану Ривзбін деп таныстырып, жарты жыл бойы хат алмасып отырған. Сөзі сыпайы, мінезі салмақты. Бір қарағанда, шын актер сияқты әсер қалдырған. Уақыт өте келе «Киану» көмек сұрай бастайды. Ол әйелден 400 доллар аударуды өтінген. Әйел еш күмәнданбастан банкке барып, ақша аудармақ болады. Алайда банк қызметкерлері шотты тексеріп, оның ойын компаниясына тиесілі екенін анықтайды. Осылайша, зейнеткер алаяқтың арбауына түспей, дер кезінде аман қалады. Бұл оқиға алаяқтардың жаңа айласына тағы бір мысал. Олар танымал тұлғалардың атын пайдаланып, адамдардың сеніміне кіреді. Содан кейін түрлі сылтаумен ақша сұрайды. Мұндай схемалар әлемнің түкпір-түкпірінде жиі кездеседі. Қазақстанда да кейінгі жылдары осыған ұқсас бірнеше жағдай тіркелген. Сарапшылардың айтуынша, мұндай алаяқтық түрі әсіресе егде жастағы адамдар арасында жиі таралған. Өйткені олар әлеуметтік желілердегі жалған аккаунттар мен шынайы парақшаларды ажыратуда қиналуы мүмкін. Мамандар кез келген күмәнді өтінішті, әсіресе ақша аударуға қатысты жағдайларды екі рет тексеруге кеңес береді. Алаяқтар көбіне асықтырады, шұғыл көмек сұрайды. Бірақ мұндай жедел әрекеттер – олардың ең жиі қолданатын әдісі. Бейтаныс адам хат жазып, жылы сөйлей бастаса – сақ болыңыз. Ол танымал актер ме, әнші ме, спортшы ма – маңызды емес. Егер ақша сұрай бастаса, бұл – алаяқтықтың анық белгісі. Ал алданып қалсаңыз, банкке және құқық қорғау органдарына дереу хабарласқаныңыз жөн.