Қазақстан ІІМ азаматтарды шетелдік қарулы қақтығыстарға қатысқаны үшін қатаң жазаланатындарын ескертті, деп хабарлайды Ozgeris.info тілшісі Polisia.kz порталына сілтеме жасай отырып.
Министрліктің мәліметінше, соңғы уақытта әлеуметтік желілерде азаматтарға ақша үшін басқа елдердің армиясына жалдануға шақыратын жарнамалар мен бейнероликтер таралуда.
Азаматтарға ақша ұсына отырып, оларды шетелдік қарулы күштердің құрамына тарту әрекеттері байқалуда. Мұндай әрекеттерге барғандар заң алдында жауап береді, – делінген ресми хабарламада.
Қазақстан Республикасының Қылмыстық кодексінің 172-бабына сәйкес, шетелдегі қақтығыстарға заңсыз қатысқан азаматтар 5 жылдан 9 жылға дейін бас бостандығынан айырылуы мүмкін.
Ал 170-бап бойынша жалдамалы ретінде соғысқа қатысқан тұлғаларға — мүлкін тәркілей отырып немесе онсыз, 7 жылдан өмір бойына дейін бас бостандығынан айыру жазасы көзделген. Кейбір жағдайда Қазақстан азаматтығынан айыру да қарастырылады.
ІІМ азаматтарды сақ болуға және заңсыз әрекеттерге жол бермеуге шақырды.