Мемлекет салық реформасын қолға алғанда, алдымен әлеуметтік салалардағы ахуалды ескеруі тиіс. Мәжіліс депутаты Асхат Аймағамбетов осы бағытта нақты ұсыныстар беріп отыр. Оның айтуынша, Салық кодексінің жаңа жобасында білім, ғылым, мәдениет, спорт пен денсаулық сақтау салаларын қолдау – басты назарда болуы керек.
Аймағамбетов бастамашы болған өзгерістер қарапайым азаматтардың қалтасына тікелей әсер ететін бірнеше бағытты қамтиды. Мәселен, мәдениет пен тарихи мұраны сақтаумен айналысатын ұйымдар корпоративтік табыс салығынан мүлде босатылуы тиіс. Бұл – саланың өз-өзін әрең сүйреп жүрген жағдайында үлкен демеу.
Ал кітап шығару мен анимация өндірісінің қосылған құн салығынан босатылуы – отандық контентке серпін береді. Осылайша, бала-шаға шетелдік мультфильммен емес, қазақша анимациямен өседі деген үміт бар.
Білім, ғылым, спорт және денсаулық сақтау ұйымдары үшін КТС мөлшерлемесін 5%-ға дейін төмендету ұсынылған. Бұл – тек заңдық өзгеріс емес, елдің ертеңіне жасалған инвестиция.
Ауыр дертке шалдыққан азаматтар үшін де бірқатар жеңілдік қарастырылған. Қатерлі ісік, орфандық аурулар, жүрек-қан тамырлары және басқа да күрделі диагноздар бойынша медициналық қызметтер мен дәрі-дәрмектерді ҚҚС-тен босату көзделіп отыр. Өзге бағыттар үшін де салықты 0%-да қалдыру немесе ең болмаса 5%-ға дейін түсіру – әлеуметтік әділеттілікке жасалған қадам.
Авторлық қаламақы мәселесі де назардан тыс қалмады. Әдеби, көркем және ғылыми еңбектердің иелеріне салықтық жеңілдік беру – шығармашылыққа берілген құрметтің белгісі.
Сонымен қатар, депутат мынандай қосымша ұсыныстарды да алға тартты:
- Қаржылық қызметтерге ҚҚС салмау – банк, зейнетақы қорлары мен төлем жүйелерінің қымбаттауына жол бермеу;
- Букмекерлік кеңселер мен казиноларға салықты айтарлықтай көбейту – әлеуметтік әділдіктің көрінісі;
- Энергетикалық сусындар мен трансмайлы өнімдерге акциз енгізу – халық денсаулығын қорғауға бағытталған шара;
- Монополиялар үшін қарастырылған жеңілдіктерді алып тастау – бәсекелестікті арттыру жолы;
- Саяжайларға салынатын салықты азайту – қарапайым халықтың мүддесін ескеру.
Асхат Аймағамбетовтің айтуынша, бұл ұсыныстар әзірге жұмыс тобының талқылауында. Соңғы шешім әлі қабылданған жоқ. Бірақ әлеуметтік саланы тұралатпай, оны дамыту үшін мұндай түзетулер ауадай қажет, деп хабарлайды Ozgeris.info тілшісі.