Қаланың сейсмикалық қауіпсіздігін арттыруға 14 млрд теңге Алматы қаласының 2025-2027 жылдарға арналған бюджетіне енгізілді. Бұл туралы мәслихаттың кезектен тыс сессиясында белгілі болды.
Бағдарлама шеңберінде ғимараттардың сейсмикалық төзімділігін анықтау үшін паспорттау жүргізіледі, бұл Жапония, АҚШ және Израиль үлгісі бойынша сейсмикалық күшейтудің қалалық бағдарламасын әзірлеуге көмектеседі.
«Алматыда мемлекеттік әлеуметтік және әкімшілік ғимараттарды сейсмикалық нығайту жұмыстары жыл сайын жүргізілуде. 2025 жылы Бостандық және Медеу аудандарындағы үш мектептің сейсмикалық күшеюі аяқталады, сондай-ақ Түрксіб ауданындағы № 50 мектеп-лицейдің сейсмикалық күшеюі бойынша жұмыстар басталады. Сейсмикалық күшейту жұмыстары Әуезов, Бостандық және Медеу аудандарындағы жеті балабақшада да жүргізіледі», — деп хабарлады қала әкімдігінде.
Сондай-ақ, көшкін қаупін бағалау және көшкін қаупі бар учаскелердің (Кіші және Үлкен Алматы, Қарғалы, Ақсай өзендері бассейні) паспортын жасау үшін 168,8 млн. теңге сомасына үш жылдық жоба іске асырылуда.